Netflix ta reforsa su compromiso cu historianan deportivo cu e estreno di Ronaldinho: The One and Only, un miniserie documental cu lo explora e bida y carera di un di e futbolistanan mas influyente y carismatico den historia reciente. E proyecto cu lo estrena dia 16 di april 2026, ta parti di un serie di produccion enfoca riba futbol Brasileño, manera a anuncia pa e plataforma di e website oficial di Netflix.
E docuserie aki ta consisti di tres episodio y tin como meta pa mustra e publico un retrato intimo di Ronaldinho Gaúcho, for di su origen na Porto Alegre te na su consagracion como un idolo global, combinando imagennan no publica, testimonionan di figuranan clave y escenanan di su bida actual. Luis Ara ta e director y guionista, mientras cu Canal Azul y Trailer Films ta comparti tareanan di produccion. Ricardo Aidar y Liz Reis ta e productornan ehecutivo di e serie documental.
E trailer oficial a keda revela riba medionan social dia 2 di april. E imagennan ta construi un trayecto for di e logronan deportivo di e futbolista te na su momentonan mas dificil. Den e recorido aki ta aparece e testimonionan di figuranan prominente di futbol manera Lionel Messi, Neymar Jr., Roberto Carlos, Gilberto Silva, Luiz Felipe Scolari, Carles Puyol y e presentado Galvão Bueno. Entre e frasenan cu ta wordo scucha ta destaca descripcionnan cu ta reforsa su aura: “E tabata un genio, semper e tabatin un sonrisa riba su cara” y “e tabata e bida di e fiesta.”
E documental tambe ta profundisa riba aspectonan mas compleho di su bida pafo di veld. E ta toca su estilo di bida marca pa exceso den fiesta, alcohol y relacionnan personal. E ta destaca tambe e vinculo clave cu e tin cu su ruman homber, Roberto de Assis, kende tabata su representante durante henter su carera. “Mi ruman a encarga di mi asuntonan henter mi bida,” e ex futbolista mes ta reconoce den e material promocional.
Ademas e trailer ta anticipa cu episodionan polemico lo no wordo evita, manera su aresto na Paraguay, un di e momentonan mas controversial di su bida pafo di veld. E incidente a sosode na maart 2020, ora cu e ex futbolista a wordo deteni hunto cu su ruman despues di a drenta e pais cu documentonan paraguayo cu contenido falso. E caso a resulta den un proceso legal cu a dura varios luna. Ronaldinho a pasa prome den detencion preventivo y despues a wordo poni bou di aresto domiciliario den un hotel.
Na augustus di e aña ey su situacion a keda resolve pa medio di un solucion alternativo cu a evita un huicio. Como parti di e acuerdo, Ronaldinho y su ruman a haci un donacion financiero di casi $200,000. E caso tambe a produci imagennan inusual cu a circula rond mundo, manera su participacion den un wega di futbol durante su encarcelamento caminda el a score ocho gol den un victoria di 11-2.
Un legado cu a marca futbol mundial
Papia di Ronaldinho ta papia di un revolucion estetico den futbol. Reconoci como un di e hungadonan mas talentoso den historia, e Brasileño a destaca pa su tecnica, creatividad y habilidad di improvisacion, popularisando movecionnan manera Elastico, Rainbow Flick of “Espaldinha”.
Su carera a alcansa su punto maximo den FC Barcelona, caminda tabata clave den gana e UEFA Champions League 2005-06 y varios titulo di liga. Ademas el a gana dos biaha e premio FIFA World Player of the Year (2004 y 2005) y tabata miembro di e seleccion di Brazil cu a gana e Copa Mundial di 2002. Door di su talento cu e bala, Ronaldinho a bira un simbolo mundial di futbol, inspirando henter un generacion di hungado y fanatico cu su estilo alegre y creativo.
E documental di Ronaldinho cu lo yega riba e plataforma di streaming dia 16 di april 2026, ta parti di un strategia di produccion mas amplio di Netflix pa explora e mundo di futbol Brasileño. Segun Tudum, e plataforma lo lansa tambe Tetra: Acreditar de Novo dia 7 di mei, enfoca riba e victoria di Mundial 1994, y Várzea: Onde Nasce o Futebol dia 8 di juni, cu ta explora futbol amateur na São Paulo.
