E poder di comunica cu intencion
Cuminsa un negoshi awendia nunca tabata asina accesibel.
Tin hermentnan, rednan social, plataformanan digital y recursonan disponibel pa casi tur hende cu tin un idea y motivacion pa lansa esaki. Sinembargo, apesar di e paisahe aki cu yen di oportunidad, hopi negoshi ta keda stanca, invisibel of luchando pa keda riba awa.
No ta pa falta di talento.
No ta pa falta di esfuerso.
No ta pa falta di deseo.
Loke hopi biaha ta haci e diferencia entre un negoshi cu ta crece y uno cu no, ta con e ta comunica loke e ta haci.
Durante añanan nos a wordo bisa cu tur loke ta necesario ta un bon producto of servicio. Cu si e ta bon “e lo bende su mes”, pero e realidad di e mercado di awendia ta proba lo contrario: loke no ta wordo comunica cu claridad, no ta wordo compronde; y loke no ta compronde no ta wordo escogi.
Awendia e hendenan no ta djis cumpra producto of servicio. Nan ta cumpra confiansa, claridad, identificacion y balor percibi. Y tur esey ta ser construi — of perdi— a traves di comunicacion.
Na Burö Creatives nos a sostene empresarionan, marcanan personal y negoshinan di tur tamaño a traves di varios etapa di crecemento. Riba e caminda ey, nos a mira un patronchi ripiti su mes: proyectonan cu potencial enorme cu no ta logra progresa, pasobra nan no sa con pa comunica nan balor.
No ta trata di haci mas, pero di haci’e miho.
No ta trata di ta riba tur plataforma, pero di tin un mensahe cla, consistente y cu ta alinea cu loke e marca kier transmiti.
Nos trabou ta bini precisamente for di aki: yuda marcanan organisa nan ideanan, defini nan mensahe y construi comunicacion strategico cu ta conecta cu e hendenan corecto.
Pa cuminsa transforma e forma cu bo marca ta presenta su mes y ta conecta, aki tin tres principio clave cu tur negoshi mester aplica for di cuminsamento.
Si bo publico no compronde rapidamente loke bo ta haci, pa ken bo ta haci’e y pakico nan mester scoge abo, bo marca ta perde su impacto. Claridad ta e prome paso pa conecta y bende.
Den e mercado actual, e hendenan no ta djis cumpra producto of servicio; nan ta cumpra confiansa, identificacion y balor percibi. Y tur esey ta wordo construi a traves di comunicacion strategico, no improvisa.
Simplemente ta riba e rednan social no ta suficiente. Comunicacion efectivo ta encera tin un mensahe structura, coherente y alinea cu bo obhetivonan. Cada pieza di contenido mester sirbi un proposito cla.
Ora cu comunicacion no tin strategia e ta deteriora, publica contenido constantemente, pero cu no ta conecta ni genera combersacion. Esaki ta afecta no solamente benta, pero tambe e empresario su confiansa y motivacion pa sigui crece.
Ora bo siña comunica bo balor, bo ta stop di competi solamente riba prijs, bo ta atrae e publico corecto y bo ta cuminsa construi un marca cu un vision a largo plaso.
E bon noticia ta cu comunica bon no ta un talento reserva pa creativonan. E ta un habilidad cu por wordo siña, ahusta y perfecciona cu tempo.
Den e proximo edicionnan nos lo profundisa mas riba e pilarnan clave manera identidad di marca, mensahe comercial, erornan comun riba rednan social y con pa crea comunicacion cu ta conecta y bende sin perde autenticidad.
Pasobra un idea por ta excelente,
pero solamente esnan cu ta wordo bon comunica ta logra crece.
Pa Mariangela Bracho y José Fajardo
CEOs – Burö Creatives
