Na inicio di e relacion di Nayijeah Burke y Kevin Iguaran ambos tabata jong. Nan a conoce otro na scol na 2017 y tabata djis disfrutando cada momento hunto. Manera casi tur relacion di hoben, nan atraccion tabata primeramente basa riba apariencia. Despues ora nan a cuminsa papia cu otro a bin descubri cu ambos tabatin hopi cos en comun y cu nan personalidad tabata bay bon cu otro, cual a haci cu e relacion cuminsa florece. Nan a pasa hunto den diferente desafio cu a yuda nan sostene otro. Durante nan estudio na Hulanda ambos a depende hopi riba otro y a siña t’ey pa otro den tur circunstancia.
Nayijeah y Kevin a bay sigui nan estudio na Hulanda na aña 2019. Nayijeah a haci su Bachelor den English Language and Culture cu un minor den Linguistica na Utrecht Universiteit y tambe un Master’s den English and Comparative Literature na Utrecht Universiteit. Y awor e ta haciendo un di dos Master’s den Educacion y trahando na un International School como docente di Ingles. Kevin a studia Commerciele Economie na Hogeschool Arnhem en Nijmegen cu enfoke riba marketing y sales cu e meta di cuminsa un negoshi propio.
Durante e añanan hunto na Hulanda nan relacion a keda bira mas fuerte y florece te ora nan a yega na fin di nan estudio. Un custumber di cas cu ambos mester a adapta prome cu nan a biba hunto tabata pa determina ora nan ta topa y pasa tempo hunto. E momento cu Nayijeah y Kevin a cuminsa comparti den mesun hogar, nan mester a busca un balans entre tempo hunto y tambe nan responsabilidadnan individual. Dios a bira un aspecto cardinal den e relacion di Nayijeah & Kevin y nan kier a tuma e paso di honra Dios cu matrimonio.
E tema di matrimonio Nayijeah y Kevin tabata combersa pa algun tempo caba. E tabata un paso cu nan kier a tuma den e fase aki di nan bida. P’esey ora Kevin a propone, e no tabata un sorpresa grandi pa Nayijeah, pero si e tabata hopi sweet y intimo. Door cu no tur e famianan di Nayijeah y Kevin por tabata na Hulanda pa e ceremonia civil, nan a dicidi di haci esaki hopi simpel. El a tuma luga un par di dia prome cu nan mester a biaha pa Aruba. Como testigonan tabata e ruman grandi di Nayijeah y Kevin su ruman chikito. Nan kier a warda tur e momentonan special pa e ceremonia Cristian na Aruba.
E ceremonia na Tierra del Sol Resort & Golf a sinti hopi mas special pa Nayijeah y Kevin paso tur nan sernan keri por tabata presente. E mas importante pa nan como pareha tabata cu nan a compromete na otro dilanti Dios. E tabata un experiencia hopi emocional, pero tambe e momento cu ambos a sinti e peso di e promesa cu nan ta haci na Dios y tambe e responsabilidad grandi cu nan a compromete na otro. Den Focus Digital Magazine di e luna aki, Nayijeah y Kevin tambe ta riba portada y ta conta mas di e momentonan memorabel. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
