CON MESTER DECORA E CAS SEGUN BO SIGNO   

E decoracion di nos cas ta algo cu nos mester tuma hopi na serio y ta un refleho di nos personalidad. Disfruta di un hogar den cual nos por sinti comodo y protegi ta esencial pa disfruta di e poco momentonan di trankilidad cu bida ta ofrece nos. Si bo kier sa con bo mester decora bo cas segun bo signo, nos lo conta bo den e articulo aki cu a sali publica den Focus Digital Magazine di luna pasa.

Aries
Bo ta un persona cu gusta bay en busca di aventura y ta odia tur loke ta convencional. Rutina no ta bay cu bo, mescos tampoco bo gusta ta na sitionan “laaf”. P’esey, bo mester opta pa uza e colornan yamativo na ora di decora bo cas. Verf e murayanan den un tono reddish y si tin textielnan cu ta match lo ta ideal. Ademas, bo por pone potret y obhetonan di bo infancia cu semper ta recorda bo origen y historia familiar.

Tauro
Amante di tur loke ta casero y natural; bo ta un persona cu ta encanta pasa tempo na cas, por lo cual bo mester cuida e decoracion y e detayenan chikito. Ta esencial pa evita colornan fuerte y yamativo manera un decoracion hopi sobrecarga. Uza e tononan pastel y belanan di color suave ta aporta un toke personal na bo hogar. E matanan manera Peace Lily y waterval chikito ta haci cu bo ta drenta tur dia den un oasis chikito. 

Geminis
Bo ta un persona dual, intuitivo y cu gran capacidad di adaptacion. Bo ta firme ora di tuma decision, aunke bo gusta comenta esaki cu e hendenan cu mas bo tin confiansa. Bo ta encanta pasa tempo cu amigo y ta semper activo, door di esey bo no ta un persona cu gusta cera su mes den cas. Debi na bo personalidad, e miho ta pa decora bo cas cu detayenen chikito y matanan cu no ta rekeri hopi cuido. Evita tin hopi mueble manera tapijt, ya cu su cuido ta rekeri hopi trabou y tempo di cual bo no ta dispone di dje.  

Cancer
Pa Cancer e miho decoracion ta esun relaciona cu tur locual ta natural. Uza tononan mas suave y cozy, cu ta laga bo sinti menos stress y cortinanan fini pa probecha e briyo di e luz di solo. Tambe por pone tapijt pa asina bo por cana pia abou den cas, locual lo aporta un gran sensacion di paz. Si bo gusta mata, esnan di colornan bibo ta ideal pa bo.   

Leo
Bo ta un persona hopi organisa y ta encanta tin e cas semper drecha y organisa. Tin biaha hasta loke ta inimaginabel. Pa bo por libera di hopi ora di limpiesa, loke ta algo pa bo ta espacionan habri y sin hopi decoracion. Busca semper un estilo minimalista y combine cu  elementonan cu ta aporta funcionalidad na bo hogar.

Virgo
Perfeccion ta core den bo adernan, p’esey bo cas mester ta semper organisa y limpi. Loke ta ideal pa Virgo ta reki chikito y cashi glas, di manera cu stof no lo ta un problema. Uzo di madera riba muraya of vloer ta ideal, pues e ta aporta e contacto chikito aki cu naturalesa cu tanto bo mester. Ademas e matanan manera orkidia ta duna bo hogar e toke personal cu tanto bo gusta.  

Libra
Sigui un estilo di decoracion manera Feng Shui ta e mas recomendabel pa e Libra. Busca semper un ekilibrio den tur cos y esaki ta precisamente loke ta busca den e forma di decoracion di cas asina extendi den actualidad. Trata pa tin un fontein chikito den cas pa tin fluidez di energia. Di e manera aki bo ta sinti den harmonia cu tur loke ta rondona bo.  

Scorpio
Bo ta un persona hopi sensibel, pero tambe di ideanan hopi cla. Bo ta encanta ser original y practico den bida, p’esey e decoracionnan hopi sobrecarga no ta bay cu bo personalidad. Trata pa mescla color y textiel como tambe uzo di plankinan chikito en bes di mueblenan grandi. Purba pa mantene hopi espacio liber, pues esaki ta duna e sensacion di libertad cu tanto bo ta busca den bo bida diario.

Capricornio
Caracterisa pa ser un persona cu un gran sintimento di deber y di responsabilidad, bo ta practico y gusta tin tur cos na ordo. Un conseho ta pa uza tononan blauw di verf, como tambe mueblenan chikito y practico. Lo ta ideal pa pone leishi cu frasenan bunita cu ta motiva y inspira. Potretnan personal cu ta refleha e fortalesa cu tin den bo tambe ta hopi recomendabel.

Acuario
Acuario, bo ta un persona hopi social y bo gusta ta rondona pa famia y amigonan. Si bo gusta tin hende na cas y ta un bon anfitrion, mester tin espacionan habri pa bo invitadonan por move cu total libertad. Añadi na bo decoracion cuadranan di paisahe natural of di  monumentonan famoso pa duna e toke sofistica cu tanto ta defini bo.

Piscis
Piscis ta un persona cu gusta sali y conoce luganan nobo, p’esey potretnan di e ultimo escapenan ta e complemento ideal pa bo hogar. Apesar cu bo no gusta hopi hende na bo cas, tin biaha no tin mas opcion cu prepara encuentronan familiar. Purba na añadi na bo decoracion mueblenan cu ta dobla, cu esey lo bo tin espacio suficiente pa ora bo hendenan bin di bishita como tambe e espacio liber cu tanto bo gusta.  

E decoracion di bo cas ta algo cu bo mester tin hopi na cuenta si bo kier disfruta di e espacio tan personal aki.