E flamante Aruba Mrs Carnival Queen 2025, Djanira Kock, a cumpli un di su soñonan pa 2025. Unabes cu el a dicidi cu e ta bay competi pa Mrs Carnaval C71, el a bisa su mes cu e ta bay p’e. Hopi aña caba su famia ta bis’e pa bay, pero semper e tabata pone un excuus. Pero un yamada cu el a ricibi puntrando si e lo kier representa TOB pa reina, a haya como contesta di biaha: “Si”. E logro como Mrs Carnival Queen ta algo hopi bunita mirando cu tempo Djanira tabata jong e no por tabata realisabel y awor den 2025 el a cumpli cu su deseo.
Djanira Kock tin 45 aña y ta un bunita mama di 3 yiu, cu nan nombernan ta cuminsa cu e letter T. E yiu mayor Tashanira tin 23 aña y ta studia na Hulanda. E di segundo yiu Tashrick tin 21 aña y ta studia na Arkansas. Den cas na Aruba ta bibando cu su mama, Tashlane cu tin 15 aña di edad. Un deseo grandi den su curason ta pa e por keda semper e bon mama pa su yiunan. Nos Mrs Carnaval Queen yen di ambiente ta un manager dedica trahando pa 8 aña caba na Popular Agencies.
