Global Issues Network (GIN) na International School of Curaçao (ISC) ta parti di un red grandi di studiante rond mundo cu tin mesun metanan; cual ta pa yuda e comunidad. Tur aña di nobo, e studiantenan di ISC GIN ta organisa diferente tipo di actividad cu ta brinda servicio y ayudo. Esaki ta inclui entre otro mantene ISC su Campus liber di uzo di plastic den tur forma, organisa dia pa muchanan di menos recurso pa haya un experencia door di bin “shop” na ISC, bishita casnan di grandi, recauda cuminda pa bestia, busca mobilario pa diferente scol y hopi mas.
Diasabra ultimo dia 15 februari, e studiantenan di GIN a tene nan di 10 edicion di “Clothing Day/Clothing Drive” na International School of Curaçao, cu e meta pa e muchanan di menos recurso for di diferente cas caminda nan ta residencia, tin e experencia di “shop”. E evento aki ta conoci como GIN Shopping Experience of mas bien Clothing Day. A transforma e gymzaal na ISC den un pacus grandi caminda alrededor di 500 mucha for di diferente fundacion, a haya e invitacion pa pasa un dia special pa nan “shop” y haya e experencia aki.
E aña aki tambe e evento tabata un exito completo. E muchanan a disfruta di e ambiente, buscando paña, co’i hunga y algun otro acesorio di nan mes escogencia. E studiantenan di GIN a trece un briyo di goso den bida di e muchanan aki. E preparacionnan a start algun siman pasa caminda e miembronan mes a colecta e pañanan, surti nan na size, set-up y transforma e gym pa haci e experencia uno placentero pa e muchanan cu a bin “shop”.
E evento aki tabata un gran exito mirando con e muchanan a disfruta di e experencia di por a shop pa nan mes y por a sinti e alegria cu tabata reina den e gymzaal. Ademas di provee paña y acesorio, e proyecto kier enfoca riba e parti caminda e hobennan por haci un diferencia den comunica door di demostra nan compasion y traha den team. E evento aki ta un recordatorio cu accionnan chikito pero haci cu amor y dedicacion tin un impacto duradero. No solamente nan a yuda nan comunidad, pero nan duna un ehempel pa otro por sigui.
 na International School of Curaçao (ISC) ta parti di un red grandi di studiante rond mundo cu tin mesun metanan){kind=link}