RCC Aruba (Rhythms Circus Company) a estrena un show completamente nobo y hopi anticipa na e publico di Aruba. E grupo local, conoci pa nan shownan semanal di baile y acrobacia, a lansa un experiencia cu ta combina nan talentonan den e mundo di circo cu canticanan energetico di rock ‘n’ roll cu nos tur conoce: Thunder Rock Circus Show.
Durante nan estreno RCC a captiva e audencia cu nan trikinan nobo y spectacular, lagando e publico cu nan curason ta bati di emocion. E grupo di artista ta sumamente contento pa anuncia cu Thunder Rock Circus Show lo ta tur diaranson cuminsando 7or di anochi na Paseo Herencia Ballroom (D&Y Cabaret). E experiencia aki ta uno completamente diferente di nan Cinema Stars Live Show cu ya pa un tempo caba nan ta presenta tur siman.
RCC Aruba ta conoci localmente pero tambe mundialmente pa nan logronan increibel den e mundo di circo. E grupo a representa Aruba na un nivel internacional y a gana varios premio y reconocimento pa nan talento y profesionalismo. Nan a presenta riba e escenarionan di mas grandi y popular, manera America’s Got Talent, Budapest Circus Festival, Hippodrome England, y hopi mas. Pero awo nan ta bek na ‘One Happy Island’ pa sigui demostra nan arte localmente.
Pa mas informacion, por follow RCC riba Facebook, Instagram, Tiktok, of bishita nan website na www.rccaua.com.
