E fiesta cu segun comentario, cu por wordo considera manera e Met Gala di Aruba, ayera nochi tabata impresionante! E fiesta anual di Kiwanis Club of Aruba, cu su tema e biaha tabata GALA OF THRONES, tabatin e combinacion perfecto pa tur hende na e evento aki por a disfruta di un experiencia excepcional.
Manera tabata di spera cu Kiwanis Club of Aruba, cu tin su experticio pa presenta su fiestanan pa recauda fondo den un concepto glamuroso, e aña aki un biaha mas a impacta totalmente. E decoracion den Renaissance Convention Center crea pa Mosaic Event Planners manera semper a resalta pa su toke di sofisticacion. E diferente booth di biña, cocktails y tambe uno di craft beer tabata sublime. Pa locual ta e parti di entretenimento cu tres banda y un DJ, tur cuater a percura pa pone un ambiente sin igual.
Despues cu tur presente a pasa na e seccion pa saca potret na entrada hunto cu e modelonan, Kiara Arends y Daniela Pop, nan a cana riba red carpet pa disfruta di e anochi, mientras e huradonan a cuminsa busca tambe e miho trahenan di GALA OF THRONES. Como Best Dressed Couple a keda escogi Ritza y Mike Lopez, Best Dressed Female a bay cu e premio Arnalda Lampe cu a luci un creacion espectacular di Gigliola Designs y como Male Best Dressed a keda Rodney Hernandez. Un aplauso grandi pa Kiwanis Club of Aruba cu un otro evento exitoso pa recauda fondo, cu e meta pa yuda nos comunidad y principalmente e muchanan a traves di nan cantidad di proyectonan.
