Pa conmemora e “Dia Internacional di Bikini”, diseñadornan di Latino America y di Aruba a crea bikininan inspira pa elementonan di nos bunita isla. Aruba su bunitesa no solamente ta duna bida na e bunita beachnan, color y hende, pero tambe inspiracionnan fabuloso pa creacion di trahenan di baño.
Cu un bunita bahada di solo y un pasarela dinamico a celebra “International Bikini Day” diabierna 5 di juli. E show aki cu tabata organisa pa Aruba Tourism Authority, tabatin como obhetivo pa lansa e coleccion nobo di 6 diseñador. E modelonan a desfila e creacionnan di e diseñadornan procedente di Brasil, Peru, Colombia, Argentina, Chile y di for di Aruba nos orguyo Gigliola Gomez. Durante e evento aki prensa y invitadonan a haya e oportunidad unico pa admira e resultado final di e diseñonan, inspira di elementonan di nos isla encantador.
